Gal 6 | ASO | STEP | Neze zuhokizo, lingine ve malite lihime nidavo ningi ma nene O'moso'mi Sikalahu' ne'mo aka lengelebizido' lisihe' gehepeve igi e'meti vaa' nave nete lingine nene amuzonga li-ngimami zou li lamini mini di hehe li-ngidi gohi ngele'mize akalo' ilo. Ne'mine igi mini lengita lengemengu' soto' o lengemelingu' nene linginesi a'mine'mine igi lihime diisa limi ingikelizaze. Gizebo lamine' igi minilo.

Galatians 6

Aka Golosou' Vikelizave Lo Ge Hize Ele' O-nede Ne Hize Ele' O-gede Li Minilizangumu' Paulo' Lo-ngimine' Gamazi

1 Neze zuhokizo, lingine ve malite lihime nidavo ningi ma nene O'moso'mi Sikalahu' ne'mo aka lengelebizido' lisihe' gehepeve igi e'meti vaa' nave nete lingine nene amuzonga li-ngimami zou li lamini mini di hehe li-ngidi gohi ngele'mize akalo' ilo. Ne'mine igi mini lengita lengemengu' soto' o lengemelingu' nene linginesi a'mine'mine igi lihime diisa limi ingikelizaze. Gizebo lamine' igi minilo. 2 Ido' geni initeli'mi lulou' minii ma nene ge hize ele' o-nede ne hize ele' o-gede li minilo. Ne'mine igi minilizani' nene Kilisito' lo huko line' lou' gamazi malo' nene mo e'meti osu' lilisave. 3 Ido' lengi' okodido' gizebo lamine' igi mini ge hize ele' o-nede ne hize ele' o-gede li minilo luvoni' nene ve mali'mo evene' muki' minani' ne'mino haza minelidoti' nene aza eikumu' gelavo evene' linge ngivile' ogo dizo mineline' nene ei' lulo've golo izosa mo lemo ongalido' mineleseinako nemu' nene luvoni' ve. 4 Nemu' nene O'moso'mo leli' hamo hamo' gonote limine' nene daloninguti' olovo' amo hamo hamo' mukito' leli' gonote gehelone' nenaze. Nemu' nene lingine hamo hamo' langisetine igi mili minaa' nani' monovotine nene lamine' nolihe goloso nolihe ize' mili ningi' nalo. Ido' ve ma gaza evene' maliti monovomu' nene ize' molo gele guno o-ngedamo asi gei' monovokamukovo' nene ningo gelanivo lamine' o neivo ma nene a'minemu' golize izo minelinido' o neive.

6 Ido' mono' gilaa' nani' aleve lingine a'mine mono' apizi lingimaa' nave nene lengitati' inite' matatine lamine' nevo ma nolinguti' nene ize' mili lingela ngimilo.

7 Lingine mo gili nizave. Mingu' inite' zuho' ikevo ne'mi gihile've nene mo inite' zuho' ani' inite' ne'mine gehepeve izaa' neine' ne'minisa lingine igi mili ilizani' monovo nene monovo lamine' nolihe goloso nolihe alinge' a'mine'mi gihile've gehepeve nene lengita izeleseinako lingine inite' amaa' iliza initekumu' nene leli' lutelo' nene ha ogo molo O'moso golo izelone li gililizadi'mo lengi' lutine nene golo izikelizave. O'moso nene golo ngeli izamilisave. 8 Ve ma ingine gomu' ngemeni dameni goloso'mi monovolo' igi mili ilizani' nene a'mine gomu' ngemeni dameni goloso'mi gihile've nene mudise vo ladise oga' nene dalisave. Ne'mine ilisaha O'moso'mi Sikalahu' ne'mi emeni damenilo' e'meti igi mili minilizani' ne'mi gihile've nene a'mine O'moso'mi Sikalahutati' nene minevo' minevo' oga' ngemeni dameni nene dalisave. 9 Ee, laza monovo danava lamine' ogo molo minakumu' nene gosele' lebelamivo a'mine monovo nene hulamo hazavo' ogo molo minelone' nene O'moso'mo molani' gamenelo' a'mine'mi gihile've nene do soto' moloso' nenako nemu' laza inite' mata' lamine' nene ogo molo minelo ma gosele' asele' amo amuzo molo ogo molo minelone. 10 Nemu' nene ne'mine ogo laza nene evene' do lamine' o-ngedo nasahili' o-ngedelonido' o neivo ma nene laza evene' muki' nene ne'mine o-ngedelone. Ido' evene' ne'mino do lamine' o-ngedeloninguti' linge nene Izesu' evenele minikevo ma ingine nene leli' zuho nizanako gomu' nene engi' do lamine' o-ngedelone' aka do soto' ogo do lamine' o-ngedelone.

Paulo' Gamazi Lo Osu' Lolosa Ga'ine Do Geke' Lo-ngedo Gizine' Gamazi

11 Gamazi mene imine' molo nogize-lingiduvoni' mene na'nise'ne neni' a'nedunu' nogize-lingiduze. Naba'mine luhuvo nogizuvoni' mene ningilo. 12 A'mine gatine hizaa' nave ingine oko'ine losuvolotikovo' igi mili iga' nani' inite' nene di soto' ikevo ne'mo Izesungumu' gili ele'vole' amani' Zuda vete engikumu' gilikevo lamine' ilive li gili lengikumu' nene okodine lolovo huki hulilizave li gatine hizaa' nani' nene a'mine gatine hizaa' nave nene Zuda vete goboni mili-lidikelizave li giladi'mo nene ne'mine iga' nave. Ee, Kilisito' aza leli' lihimetemu' hiline' nenako nemu' laza okode lolovo huko hulakumu' nene gele hulo eikumu' gele ele'vole' okunivo ne'mo O'moso'mo do lu' izeleseive lo Kilisito' evenele laza ne'mine laa' noune' nemu' Zuda vete goboni mala' mala' i-lidaa' nani' nenako nemu' gili ne'mine i-lidikelizave li ingine gatine hizi okodine lolovo huki hulilizave li li-lingidaa' nave. 13 Ido' oko'ine lolovo hukave ingine nesi nene Mose' lou' gamazi linge malo' nene gili di osu' lamani'za a'mine ve ingine nene linginesi okodine lolovo huki huli lelita igi gi'mizi minikevo ne'mo nene leli' guvete vilive lisa engi' oko'ine di dizilisa nene lengi' gatine hizi okodine lolovo huki hulilizave li li-lingidaa' nave. 14 Ingine ne'mine iga' naha neni' nene inite' mamukisi oko'ne ma do dizesa'muve. Asi Guvetesi ve Izesu' Kilisito' do lu' izelesa lohoto' zalo' hiline' nemukovo' nene do naba ogo minaa' nouve. Kilisito' lohoto' zalo' hiline' ne'mo naza me misubou' monovote goloso okode losuvoloti' nene evene' lamine' none lo okode do dizaa' monovo goloso nevo'mine nene mudise hulosa a'mine monovomu' giluvo mo hele osu' lani' nenako neni' lu'neu' nene gohi ma minevo' dovo' amilido' neive. Ido' Kilisito' lohoto' zalo' hilingu' nene nazasi hiluvoni' gelavo a'mine me misubou' monovo goloso ne'mo neni' lu'ne nene gohi ma do ote-nedamilido' o neive. 15 Laza nene okode lolovo huko hulosa none' nolihe huko hulamo none' nolihe ne'mo inite' gihile a'mingu' ma nomive. Asi gosoho' lemeni dameni lamine' do otuho minaa' ne'mo nene inite' gihile neive. Nemu' nene naza oko'ne losuvoloti' nene evene' lamine' nouve lo oko'ne do dizamo Kilisito' lohoto' zalo' hiline' nemukovo' nene do naba ogo minaa' nouve. 16 Ido' nemu' nene a'mine noluvoni' gamazilo' nene e'meti igi mili minilizave nene lengita O'mosolati' hongu nesi ido' mangi gatulo nesi nene mino Isilaele' zuho gihile O'moso'mi evenele mukitasi nene mine do vo miniliho lo noluve.

17 Gamazi nene mo osu' nolivo naza ti' lo noluve: Izesu'nimu' gele ele'vole' uvoni' nemu' goboni mili-nidi neni' oko'nelo' nibilani' hu'ne nene Izesu' ei' noso've ne'mino asi've molo-nedavo nouvoni' nenako nemu' nene gohi lihitehe' inite' igi geni nebeleli akalo' nele'mize milalizave lo gelamuve. 18 Ido' neze zuhokizo, leli' Guvetesi ve Izesu' Kilisito' do lamine' o-ledaa' neine' monovo've lamine' ne'mo lutingu' mine do vo minivo. Ne'mino miniliho. Moda ve.